Set av eitt mål av gardsbruket til blomstereng
Vi føreslår at alle gardsbruk i kommunen set av minimum eitt mål av garden til blomstereng, skriv Magnar Falkenstein i Raudt Indre Sunnfjord.
![](https://harvestmag.imgix.net/pan/Bie.jpg?auto=compress%2Cformat&fit=clip&fm=jpg&q=80&sharp=10&w=400&s=4dc8e99b1319fb8ccdf59403b01f0382 400w, https://harvestmag.imgix.net/pan/Bie.jpg?auto=compress%2Cformat&fit=clip&fm=jpg&q=80&sharp=10&w=650&s=39b041ad536345248358cf050e2f854a 650w, https://harvestmag.imgix.net/pan/Bie.jpg?auto=compress%2Cformat&fit=clip&fm=jpg&q=80&sharp=10&w=900&s=fc8fffc031aab76e8fae54ef3077bfe9 900w, https://harvestmag.imgix.net/pan/Bie.jpg?auto=compress%2Cformat&fit=clip&fm=jpg&q=80&sharp=10&w=1150&s=177c9067bbde62a6d49444f79f96ab4c 1150w, https://harvestmag.imgix.net/pan/Bie.jpg?auto=compress%2Cformat&fit=clip&fm=jpg&q=80&sharp=10&w=1400&s=4ca80700ff31d5a9e985cc3facb381f0 1400w, https://harvestmag.imgix.net/pan/Bie.jpg?auto=compress%2Cformat&fit=clip&fm=jpg&q=80&sharp=10&w=1650&s=5e68f3b493ce2a3b66cceda211cda810 1650w, https://harvestmag.imgix.net/pan/Bie.jpg?auto=compress%2Cformat&fit=clip&fm=jpg&q=80&sharp=10&w=1800&s=4872de3cc38b5b7882c098348af1480e 1800w)
Dei siste tiåra har vist ein samanhengande nedgang for insekta. Dette kan få dramatiske fylgjer for oss menneske, då vi er heilt avhengige av insekta som bier, humler, kveps og andre pollinerande insekt for å overleva. Også andre insekt er livsviktige for oss, berre tenk på nedbryting i naturen til dømes.
I det nye fylket Innlandet kan no bønder få støtte for å ta vare på pollinatorvenlege frøblandingar på jordbruksareal. Sonene må ha pollinatorvenlege blomar gjennom vekstsesongen. Arealet får tilskot og må ikkje gjødslast eller sprøytast med plantevernmiddel.
Raudt Indre Sunnfjord meiner at ei liknande ordning må takast i bruk i den nye kommunen Sunnfjord. Vi føreslår at alle gardsbruk i kommunen set av minimum eit mål av garden til blomstereng. Dette må sjølvsagt få økonomisk støtte frå kommunen.
Beste områda til dette er tørre område med næringsfattig jord, så noko stort avlingstap burde det ikkje bli. Områda kan slåast, men ikkje før etter frøspreiing. Høyet bør sjølvsagt brukast som dyrefôr, og areala kan også beitast om hausten.
Lat oss gjera nye Sunnfjord kommune til ein velkomststad for insekta våre, til ein blomekommune.
Nokre gardsbruk har allereide i dag slik gammal blomstereng, men det burde vera ei enkel sak at alle får dette til. Etter det vi har kjennskap til, er det i dag mogleg å få tak i frøblandingar til slik eng.
Dei fleste med ein bustad i tettstadane i kommunen bør også delta i eit slikt prosjekt: Set av ein liten del av plenen til eit insektvenleg område, ein liten "jungel".
Dette er tiltak som skulle vera svært enkelt å sette ut i livet. Lat oss gjera nye Sunnfjord kommune til ein velkomststad for insekta våre, til ein blomekommune. Det er til vårt eige beste!