Den første turen
Rasmus Hanssons beste tur
Tre veker i 1977, fra Romsdal til Oslo på ski. Rasmus Hanssons fyrste langtur er enno hans beste.
![](https://harvestmag.imgix.net/images/Importert/rasmus_skitur_1500_974_90.jpg?auto=compress%2Cformat&crop=focalpoint&fit=crop&fm=jpg&fp-x=0.5&fp-y=0.5&h=800&q=80&sharp=10&w=600&s=26ee04f2ef83a6f85dbacbdffd35094f 600w, https://harvestmag.imgix.net/images/Importert/rasmus_skitur_1500_974_90.jpg?auto=compress%2Cformat&crop=focalpoint&fit=crop&fm=jpg&fp-x=0.5&fp-y=0.5&h=1133&q=80&sharp=10&w=850&s=555008263a03052f8d8ca3d0952253c4 850w, https://harvestmag.imgix.net/images/Importert/rasmus_skitur_1500_974_90.jpg?auto=compress%2Cformat&crop=focalpoint&fit=crop&fm=jpg&fp-x=0.5&fp-y=0.5&h=1467&q=80&sharp=10&w=1100&s=696e299886e447ca0b9ff1004a2029cb 1100w, https://harvestmag.imgix.net/images/Importert/rasmus_skitur_1500_974_90.jpg?auto=compress%2Cformat&crop=focalpoint&fit=crop&fm=jpg&fp-x=0.5&fp-y=0.5&h=1600&q=80&sharp=10&w=1200&s=944204737d334453ec162ddd99300eb6 1200w)
Han må tenkje seg om. Stortingsrepresentanten frå Miljøpartiet dei Grøne og biolog Rasmus Hansson har gått uendeleg mange turar. Både korte og lange. Dagsturar og ekspedisjonar. På fjell, i marka og ved havet. Den fyrste turen, den som verkeleg tende gnisten?
Så landar han:
Det må bli turen frå Romsdal til Oslo. Turen var akkurat så suveren som ein kunne ynskje seg. Me hadde alt slags ver og føre. Proppfullt av opplevingar. Saman med fem kompisar som gjev meg mykje. Men den fyrste turen min var det jo ikkje. Mor mi har taua meg ut på tur så lenge eg kan hugse. Å vere på tur er noko som alltid har vore ein del av kvardagen min. Eg tok nok ut ungdomsopprøret på andre måtar enn å nekte å vere med på tur. Når eg likevel skal plukke meg ut ein skjelsettande tur, så må det bli romsdalsturen. Den bekrefta for meg at jo lenger enn er ute på tur, dess betre er det.
Det var ein vinter i 1977, i tida før påske. Me var seks mann som gjekk mykje på tur saman. Spørsmålet var å finne unnskyldningar for å vere mest mogleg ute i finast mogleg terreng. Ideen om langturen gjennom Noreg kom me på under andre turar i Nordmarka. Planlegginga gjekk kjapt.
Heime hjå meg la me alle karta ut på golvet, sette koppar og kar oppå og krabba rundt. Teikna litt, planla og bretta hjørne for å få karta til å passe saman.
![](https://harvestmag.imgix.net/images/Importert/Rasmus_leser_kart_1500_974_90.jpg?auto=compress%2Cformat&fit=clip&fm=jpg&q=80&sharp=10&w=400&s=768138590e007fde659d949550f82543 400w, https://harvestmag.imgix.net/images/Importert/Rasmus_leser_kart_1500_974_90.jpg?auto=compress%2Cformat&fit=clip&fm=jpg&q=80&sharp=10&w=650&s=43801068ce3d531253b13e8e346c0ac7 650w, https://harvestmag.imgix.net/images/Importert/Rasmus_leser_kart_1500_974_90.jpg?auto=compress%2Cformat&fit=clip&fm=jpg&q=80&sharp=10&w=900&s=d595a9b4a75ef833cb5e2ef64f4108de 900w, https://harvestmag.imgix.net/images/Importert/Rasmus_leser_kart_1500_974_90.jpg?auto=compress%2Cformat&fit=clip&fm=jpg&q=80&sharp=10&w=1150&s=6a1094556a1e700e53001a423b14b784 1150w, https://harvestmag.imgix.net/images/Importert/Rasmus_leser_kart_1500_974_90.jpg?auto=compress%2Cformat&fit=clip&fm=jpg&q=80&sharp=10&w=1400&s=91b28f94dd61d53396dad91e6d4ffaf0 1400w, https://harvestmag.imgix.net/images/Importert/Rasmus_leser_kart_1500_974_90.jpg?auto=compress%2Cformat&fit=clip&fm=jpg&q=80&sharp=10&w=1650&s=600f6780985f5bcb3bf7266ebf4277aa 1650w, https://harvestmag.imgix.net/images/Importert/Rasmus_leser_kart_1500_974_90.jpg?auto=compress%2Cformat&fit=clip&fm=jpg&q=80&sharp=10&w=1800&s=1be80714727137d2ca306e9a1b71eeb8 1800w)
Den fyrste dagsetappa trur eg alle hugsar godt. Sekkane var stappfulle. Me var i botnen av Tafjordfjella. Vassa rundt i laussnø og bjørkeskog. At det kan vere ganske kavete, kan nok mange kjenne seg igjen i. Dagen blei lang og enda med at ein av gutane sovna med koteletten i kjeften, noko som blei ettertrykkeleg fotografert.
Turen sørover gjennom Tafjordfjella var svært fin. Vidare kom me inn i Jotunheimen. Det var mars, og enno sjølvsagt kaldt i fjellheimen. Lars forfraus foten, men barsk som han er, gjekk han vidare. I Breheimen hadde me nokre av dei beste dagane. Eit par av dei var så fullstendig gnistrande som det går an å få det i høgfjellet om vinteren. Sekkane var framleis tunge, men det var nesten så me krangla om å gå fyrst i laussnøen. Den snøflata der hugsar alle som eksepsjonell vakker.
Teltplassar har eg hatt mange av opp gjennom åra, men akkurat den hugsar eg godt. Det var ein slik fantastisk stille og klar kveld. Teltet låg heilt ut på kanten av skavlen, og eg trur det var Stryn me såg rett ned til. 1000 meter rett ned. Der var det fint å vakne.
Like fine dagsetappar fekk me etter at me hadde gjort oss ferdige med dei høge og kjølige områda i Breheimen og Jotunheimen. Langsamt gjekk me nedover låge fjell. Inn i fjellskogen nord i Valdres. Nedover i storskog i Vassfaret. Klatra opp og gjekk nedover Oslomarka. Eit fantastisk geografisk lengdesnitt av Sør-Noreg. Mykje forskjellig slags natur, mange forskjellige inntrykk..
På ein over tre vekers lang tur skjedde det sjølvsagt mykje. På Honnspikja oppe i Breheimen for eksempel. Det bles mykje, me såg ingenting og gjekk ut i eit område som var brattare enn det burde. Laussnø var det mykje av. Plutseleg kom det ekle drønnet. Eg såg sprekken opne seg i snøen ved sidan av meg. Tenkte at no er det over. Men så stoppa det like fort som det starta. Då stod hjartet stille eit sekund. Hadde den fonna roke ut, hadde me ikkje klart oss. Slike opplevingar heng i. Ein anna dag køyrte me nedover nokre nydelege bekkedalar med mykje snø. Bakerste mann køyrte litt for nært, gjekk rett på hovudet og blei ståande opp ned i eit laussnøhol med tung ryggsekk, og hovudet meir eller mindre ned i vatnet. Utan å kome seg nokon veg. Me andre fekk ikkje gjort noko anna enn å le oss skakke. Sjølv blei han etter kvart ganske sur der han hang, men me andre hadde det ufatteleg morosamt.
Siste dagen på tur hadde me knapt med mat igjen. Me var heilt nord i Oslo-marka. På kvelden begynte med å «trade» matrestar mellom telta. Det var mørkt og me såg ikkje kva me fekk. Teltkameraten min og eg koka opp det me fekk tak i, og helte det i oss. Ut på natta fór me opp med frykteleg vondt i magen. Då dagsljoset kom fann me ut at det stort sett var smør me hadde ete.
Eigentleg skravla me oss gjennom Noreg. Ein slags kontinuerleg kunnskapskonkurranse underheldt oss heile vegen. Det heng framleis igjen mykje fakta om unyttige ting frå vandrande quizar på sånne turar. Nesten alle studerte forskjellige fag, og syntest det var artig med fag, politikk og diskusjon. Målet var aldri at dette skulle vere nokon ekstremtur. Me ville berre vere ute.
Etter 25 dagar var me framme i Oslo. Alle gjekk på ski heilt heim. Nedover fortaua og inn i bakgarden. Spesielt slitne var me ikkje. Det var berre dei fyrste dagane.
Me har mimra om å ta turen igjen. Jo lengre ein tur er, dess hyggelegare blir han, stort sett. Me flirte jo oss gjennom dagane.
Draumen om Noreg på langs er framleis levande.
![](https://harvestmag.imgix.net/images/Importert/koking_rasmustur_1105_940_90.jpg?auto=compress%2Cformat&fit=clip&fm=jpg&q=80&sharp=10&w=400&s=5a1ceef576eccd7e706e9a30ae1f5220 400w, https://harvestmag.imgix.net/images/Importert/koking_rasmustur_1105_940_90.jpg?auto=compress%2Cformat&fit=clip&fm=jpg&q=80&sharp=10&w=650&s=4e09027f0710e98cdc11fd332342a2aa 650w, https://harvestmag.imgix.net/images/Importert/koking_rasmustur_1105_940_90.jpg?auto=compress%2Cformat&fit=clip&fm=jpg&q=80&sharp=10&w=900&s=5d0a6a893e1298aed22ba1e4168ab100 900w, https://harvestmag.imgix.net/images/Importert/koking_rasmustur_1105_940_90.jpg?auto=compress%2Cformat&fit=clip&fm=jpg&q=80&sharp=10&w=1150&s=74f70eaad261f3ba13816fc3421a9b70 1150w, https://harvestmag.imgix.net/images/Importert/koking_rasmustur_1105_940_90.jpg?auto=compress%2Cformat&fit=clip&fm=jpg&q=80&sharp=10&w=1400&s=54e4e25f1373b544c0778acb59613543 1400w, https://harvestmag.imgix.net/images/Importert/koking_rasmustur_1105_940_90.jpg?auto=compress%2Cformat&fit=clip&fm=jpg&q=80&sharp=10&w=1650&s=1ebbfb4f8a37b789792d952f707aa189 1650w, https://harvestmag.imgix.net/images/Importert/koking_rasmustur_1105_940_90.jpg?auto=compress%2Cformat&fit=clip&fm=jpg&q=80&sharp=10&w=1800&s=b64b484a65053e4c8bfc3f10cf662ffb 1800w)
![](https://harvestmag.imgix.net/images/Importert/Morgen_ved_teltene_1348_766_90.jpg?auto=compress%2Cformat&fit=clip&fm=jpg&q=80&sharp=10&w=400&s=2cc060be7d039b64eb549d31dd5ecb73 400w, https://harvestmag.imgix.net/images/Importert/Morgen_ved_teltene_1348_766_90.jpg?auto=compress%2Cformat&fit=clip&fm=jpg&q=80&sharp=10&w=650&s=082ae87d7c100470d1c1c8372f23251c 650w, https://harvestmag.imgix.net/images/Importert/Morgen_ved_teltene_1348_766_90.jpg?auto=compress%2Cformat&fit=clip&fm=jpg&q=80&sharp=10&w=900&s=f7e7b9c3bc90d271c7b400a3b8c17edd 900w, https://harvestmag.imgix.net/images/Importert/Morgen_ved_teltene_1348_766_90.jpg?auto=compress%2Cformat&fit=clip&fm=jpg&q=80&sharp=10&w=1150&s=8678a3e1ba11fc5364a33d7f900b0e80 1150w, https://harvestmag.imgix.net/images/Importert/Morgen_ved_teltene_1348_766_90.jpg?auto=compress%2Cformat&fit=clip&fm=jpg&q=80&sharp=10&w=1400&s=4a7b8d2e3c87cd43d9a47255a9ab74e4 1400w, https://harvestmag.imgix.net/images/Importert/Morgen_ved_teltene_1348_766_90.jpg?auto=compress%2Cformat&fit=clip&fm=jpg&q=80&sharp=10&w=1650&s=8be4acd47f70bca17f40b809a81976ed 1650w, https://harvestmag.imgix.net/images/Importert/Morgen_ved_teltene_1348_766_90.jpg?auto=compress%2Cformat&fit=clip&fm=jpg&q=80&sharp=10&w=1800&s=82a1f992455c6b63f1db18ee25e7a5b5 1800w)
![](https://harvestmag.imgix.net/images/Importert/Rasmus_i_utfor_649_1000_90.jpg?auto=compress%2Cformat&fit=clip&fm=jpg&q=80&sharp=10&w=400&s=ad03789e7b215eb17acbdd149277c4a3 400w, https://harvestmag.imgix.net/images/Importert/Rasmus_i_utfor_649_1000_90.jpg?auto=compress%2Cformat&fit=clip&fm=jpg&q=80&sharp=10&w=650&s=961df001c6040947a5196105ba0480d9 650w, https://harvestmag.imgix.net/images/Importert/Rasmus_i_utfor_649_1000_90.jpg?auto=compress%2Cformat&fit=clip&fm=jpg&q=80&sharp=10&w=900&s=6ec4c296325dbf895bf497393279d7ea 900w, https://harvestmag.imgix.net/images/Importert/Rasmus_i_utfor_649_1000_90.jpg?auto=compress%2Cformat&fit=clip&fm=jpg&q=80&sharp=10&w=1150&s=b03790f30f33e5252cb4716a62f8af12 1150w, https://harvestmag.imgix.net/images/Importert/Rasmus_i_utfor_649_1000_90.jpg?auto=compress%2Cformat&fit=clip&fm=jpg&q=80&sharp=10&w=1400&s=ced8cd4b5cd5fee17eb085a2156cbd34 1400w, https://harvestmag.imgix.net/images/Importert/Rasmus_i_utfor_649_1000_90.jpg?auto=compress%2Cformat&fit=clip&fm=jpg&q=80&sharp=10&w=1650&s=f50c0ae4d742ce8e80a8777bace0a4a5 1650w, https://harvestmag.imgix.net/images/Importert/Rasmus_i_utfor_649_1000_90.jpg?auto=compress%2Cformat&fit=clip&fm=jpg&q=80&sharp=10&w=1800&s=6fc7631d6f8fc87f84ee711542be02a6 1800w)